Sunday, April 21, 2013

11

හිත ලඟින් ඇවිදලා
සිනා සුළඟක් ගෙනල්ලා
ආදරේ විශ්වයේ මා එක්ක සැරිසරා
යන්න ඔබ - එන්න මා වෙත
දෑත් පටලා ලංවෙලා

හිතට හිත ගුලිවෙලා
නෙතට නෙත ඉඟිමරා
විහඟුන්ට මල්වලට ආදරේ වපුරලා  
අපි අපිට ලංව ඇවිදිමු දෑත් පටලා එක්වෙලා

නිදි නොලද රෑ කළුවරේ
නෙතු පියන් ඈත සිහිනේ
පාවෙලා පියඹලා හීනයෙන් ගොඩවෙලා
අපි අපිට ලංව ඇවිදිමු දෑත් පටලා එක්වෙලා

Saturday, March 30, 2013

10.

පාවෙන පින්න මල් මද පවනේ
ඔබ වගෙයි, ගෙවන දඟකාර ජීවිතේ
සැඩ සුළං ඒවී ඔබ දුර රැගෙන යන ලෙසේ
පාවෙලා විත් රැඳෙනු හද මත
රැකගනිමි මගේ පණ වගේ...

09.

සිනා සෙන්නට සිතක් නැතිමුත්
ඔබ මගෙන් බෝ දුරක් ගිය දා
සිනා සෙන්නම් මසිත රවටා
දෙනෙත් අග රැඳී කඳුළු පිසදා...

Friday, March 15, 2013

08.

නිල් අහස ලස්සනයි කොහේවත් ඉවරයක් නෑ
මේ පොළව විසාලයි කොහේවත් ඉවරයක් නෑ
මගෙ ආදරෙත් එසෙයි කොහේවත් ඉවරයක් නෑ
කීව ඔබ දුර ගිහින් අද මගේ ලඟින් නෑ
ආදරේ ඉවරයක් තිබුනත් විඳින දුක ඉවරයක් නෑ...

Sunday, February 17, 2013

07.

දුක අසා ලඟින් හිඳ
කඳුළු කැට අතින් පිස
හිස අතගා සෙනෙහෙ පුදා
ඇතුළු වුනේ ඇයි හදවතට ඔබ?

ජිවිතයේ ඉතිරි දුර
ළඟ ඉඳන් ගෙවන්නට
අතින් අත පටලවන්
යනෙන ලෙස ඉඟිකළේ කිම?

සෝ කඳුළු ගංගාවෙ
පාළුවේ පාරුවේ
ඔබ නමැති හබල නෑ අද
බෝ දුරයි සතුටු සාගරේ...

පිහිනන්න හැකි උවත්
ගඟේ සැඩ පහර මැද
හිනැහෙන්න බෑ මසිත
ඔබ නැති දුකින් මගහැර...

Monday, February 4, 2013

06.

සිනහවේ රන් ඉරක් ඔබෙ වතේ පායද්දි
ආදරේ සුදු නෙළුම් ඔබෙ වතේ පූදිද්දි
බාධාවෙ වැට කඩොළු මග අවුරා ඉද්දි
සෝ දුකේ කදුළුබිඳු හදවතේ ඉකිබිඳී...

Thursday, January 31, 2013

05.

සුදුම සුදු සුදු නෙළුම
    පිපෙන්නට සැරසේවි
එකම එක එක ඉරක්
    අපිට හෙට පායාවි
හෙටම හෙට හෙට දවසෙ
    අපිට අපි හිමිවේවි
සිතම සිත සිත පතන
    එකම දේ ඔබ පමණි